2014

Wi’j, Prins Peter den darden,
Huisman van Nicole en trotse va van veer prachtige gromm’n.
Gildemeester van de, met carnaval besmette, wagengroep 4-us.
Beschermheer van bizundere blagen en uutbater van volleyballende jöngskes en deerns, en

Adjudant Maurice,
een Grolsen telg oet het Lankveld-Abbas geslacht.
Veult zich thoes an den Emau 27 met Bianca en Juul.
Van wagenbouwer bi’j de Zorro’s èn de fusieclub tot atmosfeerbouwer in de Pruus.
Van pennelikker van de Hartslag buurte tot Groothertog in ’t volleybal.

Verordonneert en maakt bekend dat:

Ten eersten
waor verstand zit kan gin haor zitt’n

Ten tweeden
da’j better op het nus ‘evangen könt wodd’n, dan da’j het nus onder ‘n boom hebt.

Ten darden
laot het Carnavalsvirus ook dit jaor weer oaverslaon op de Zorro’s

Ten veerden
wi’j volleyballers holt ’t geerne simpel en spölt dus graag met de hande. Bier drinken doo’j toch ok neet met de veute.

Ten viefden
de Grolse binnenstad hef weer stromend water. Laot den Lechtenvoordsen optocht no maor komm’n.

Ten zesden
a’w zo deur gaot met het opruumen van al het greun in Grolle, dan is ons stadjen binnenkort neet “Groenrijk” maor “Groenloos”.

Ten zeuvenden, een speciaal alaaf veur de volleybalvereniging Grol, den volgende maond vieftg jaor besteet. Laot wi’j d’r maor ne korten time out op nemm’n en d’r ene op drinken. Bas, breng maor een glaesken.

Ten achtsten
de Huismans holt neet zo van blaozen, dat dut zien’n schoonva Bertus wal

Ten negenden
in Grolle en omstreken leaft völle Peters, van nölepeters tot prutjepeters en van ösepeters tot sjikkerpeters.

Ten reserve
Kees Porskamp hölt ziene buuts tegenwoordig neet meer in de nöaletonne maor in de raod

Ten tienden
völle straoten in Grolle bunt op e’brokken. Grolle, i’j könt er neet meer umhen maor ok neet meer deurhen.

Ten elfden
i’j bunt pas ne echten Grolsen a’j de Knunnekes liked op Facebook

Aldus op’emaakt in de veste Grol

15 november 2013
Knunnekes, alaaf!

Set ‘m op!