Tweede Jeugd: Prins Cor en adjudant Harrie

En ook het laatste prinsenpaar van de Knunnekes is bekend: Tweede Jeugd-Prins Cor Bleumink en Tweede Jeugd-Adjudant Harrie Ribbers. Ze regeren deze Carnaval onder het motto ‘No is ‘t tied veur een pilsje’.

Het kersverse prinsenpaar werd onthuld tijdens het drukbezochte en ontzettend gezellige Tweede Jeugd Carnaval in de grote zaal van City Lido. Hieronder lees je de maidenspeech en de proclamatie van de kersverse hoogheden.

Maidenspeech Tweede Jeugd-Prins Cor en Tweede Jeugd-Adjudant Harrie

Cor:
Argens, in September, bun ik door Hennie Schovers e’vraogt,
um te kommen proaten, over een adressenbestand veur de Grol.
Dat was natuurlijk gin probleem, dus werd er een aovond e pland.

Ik zat bi’j Hennie nog moar net op ’n stool, kwam ok Maarten Kooiker binnen, met een steek van de carnaval, en den gaffe mien.
Hee vroag mi-j, of ik de tweede jeugdprins van Grolle wöl worden.

Toon zei ik, dat ik dat wal leuk zol vinden, moar eerst met miene vrouwe mos overleggen,
zoals wi-j dat altied doot. Op de fietse terug noar hoes, was ik d’r nog ondersteboaven van.
Hennie zei nog wal, dat alles in het deepste geheim, most gebeuren.
Het lik de KGB wal.
Eenmoal toes, keek Truus mien an, en ze zij tegen mie, wat bun ie d’r al snel weer.
Ik vertelde heur, da’k was e’vroagt, um tweede jeugdsprins te worden.
Ze keek mien an, of zé het in Köln had heuren donderen,
moar zei’j, “A’j dat mooi vind, dan moj dat moar doon”

Ik kreeg de opdracht, om een adjudant te zeuken.
Wie zóllen dan weer een afspraak maken, om den veur te stellen.

Ik dacht metene an Harrie Ribbers.
No mos ik een smoesje verzinnen, dat ok hé, bi-j Hennie ging anschoeven
Harrie is nogal begoan met Excel, en ik vroog an hum, of hé met mien met wol goan, um ‘n adressenbestand, veur de Grol te besprekken.
Dat was gin probleem, en 11 december werd vastte zet.
Probleem 1 was opgelost.

No mos Harrie ziene vrouwe, Hermine, ok noar dat adres,
zonder dat ze argwaan krig.
Miene vrouwe Truus, kwam op het idee, om heur met te nemmen,
noar een kerst-kunst-oavond in Doetinchem
Hermine ging akkoord, ok den oavond was verzekerd.
Truus en ik, hadden de grootste lol, want wie wisten,
dat ‘t anders zol lopen, en wi’j waren beniejd,
naar de reacties van die twee.
Moar dat zal Harrie jullie wal vertell’n

Harrie:
Cor en ik, bunt kammereu van mekare.
Wi-j knutselt, nogal, wat met Excel.
En wi’j, maakt programma’s veur bedrieven.
De letste tied, nogal wat edone, veur de Super Elf.
I-j wet wal, dat voetbal spel, woar de opbrengst,
noar de supporters-club, van s.v.Grol geet.

D’r was dus ok niks vrumd an, toon Cor zei,
“Bi-j Grol, zeukt ze nog een adressen programma.”
Dat hadden wi-j, al wal vaker done.
He zei nog, “Ik nem oe, bi’j ’t eerste oaverleg, metene met,
anders mok oe alles opniej oetleggen.”

Den oavend, kump he bi-j mi-j, op de fietse.
Cor zei, “wi-j mot, bi-j een van de leden, thoes weazen”.
Nog steeds, hek nargens een idee van, wat er an de hand was.
Komme wi-j bi-j Hennie.
Dat is toch nun echten Grol fan.
Kump doar ok ene Maarten Kooiker binnen.
Dat zal wal toevallig wezen. En nog steeds, hek niks in de gaten.

Ligt doar op toafel, twee van dee carnavals mutsen.
Wet ik völle, Hennie is toch ok bij de Carnaval.
Toen kwam Cor met de opmerking,
“Wi-j bunt hier, helemoal neet, veur een adressen programma.”
Hennie gaf Cor, de twee steken.
Cor vrög an mi-j, “zol i-j mien adjudant willen wêzen, want ze hebt mi-j e vroagd, as de Tweede Jeugd Prins.”

Ik geleuve, da‘k nog nooit, zo dom um mi-j henne kekkene heb.
Ik snapten der eerst niks van.
Komp doar ok Truus an, in gezelschap van Hermine.
Ok zee wis nargens van, want ze zol, met Truus metgoan, noar een of andere, kunstveurstelling.
Ok Hermine, was een betjen van slag. Wat?… Ie-j?… Ho dan…

Toen ik joa had ezegd, krig ik ok ’n steek in de hande drukt.
Doornoa hew der nog een paar op e’dronken.
As dat een veurbode was, veur de carnaval, dan krie’w nen donders mooien tied.

Dus, löw no moar drék beginnen:

Proclamatie

Wi-j

Achtste Tweedejeugdprins Cor

Geboren op de Grolse Watermölle, an de Borculoseweg
Kruidenier van Grolle tot de VS
Veurzitter van het Meesterschap op Banninghof
En veurzitter van de brandweervereniging “De Noasmeulers”
Old commandant van de Grolse Brandweer en Koninklijk onderscheiden,
tot trouwe schutter van De Kroon
Van Programmaleider van de Grolse Superelf
Tot mooi weer mepper bi-j de Grolse Tennisclub

En

Achtste Tweedejeugdadjudant Harrie

Rasechte Grolsen, geboren binnen de Grolse Grachte
Zondagskind met Beltrumse olders, dee op tied noar Grolle verhuusden
Van handige Harrie in Grolle, tot meestertechneut in de rest van de wereld
Van computerspecialist, tot een Grolse Ceulemans bi-j Frielink
Van Grolse Schutterskoning, tot Knunnekes adjudant

Verordoneert en maakt bekend dat:

Ten Eersten
Um te scheten kun ie ok bi-j Café Frielink terechtte.
Dat dok ik al vieftig joar en nog steeds oet de losse hand.
Den vogel op de Maliebane, heb ik d’r nog nooit d’r af e’schotten,
maor d’en noffel hier noast mi-jn wal!

Ten Tweeden
Van den pastoor oet Beltrum mocht’r zundags neet e voetbalt wonn.
In Grolle wed dat wal e done, dus den Beltrumse pastoor prêêkte;
“A’j over de brugge goat in Grolle, dan kom ie in Sodom en Gomorra!”
Loat dee Brugge no precies wen ewes, woar dissen Prins zien oldershoes stond.
Zoll den Pastoor het toch good hemm e’had?

Ten Daarden
De fusie tussen Grol en Grolse boys is no un feit,
de rooien en de blauwen bunt no eindeluks bi-j mekare.
De gemeente hef no dee groond e’koch,
um doar nun viever van te maken en doarumme vist Longa in Grolle mooi achter het net.

Ten Veerden
De rotonde bi-j Meijer, ie wet wal doar bij “Huuze Welgelegen” hef nun mooien cent e kost.
Wi-j zei’n al tegen mekare, dee scharpe punten veur ut afsloan bunt nogal geveurluk.
Ut gewone volk hef best wal kiek op zulke dingen, no wilt ze dat weer anpassen, dus wi-j kriegt onze olde rotonde, gewoon weer terugge.

Ten Viefden
Wi-j vind ’n schaatsbane bi-j de halve moane van de ijscomissie een mooi initiatief .
En met gemeentelijke ondersteuning mot dat zeker lukken.
Hoppelijk geet ‘t de kommende joaren ok nog ’n keer vrezen.

Ten Zesden
De kerkelijke achtergrond van de Bron krig weer ne ni-jen betekenis.
Ze wilt doar no ‘n “Integraal Kindcentrum” van maken .
Dan kunt ze ok weer zeggen, “Loat de kinder tot mi-j kommen”.

Ten Zeuvende
Op den Laarberg, bunt ze van plan um un mestvergister te bouwen.
Den dokter oet de Noteboomstroat en nog vol meer leu bunt door nogal op tegen.
Want wat motte wi-j met un installatie, dee meer rotzooi maakt, dan datte verwarkt.

Ten Achtsten
Ok in Grolle mot wi-j wat an ‘t energie verbruk doan um Groningen neet helemaal leug te zoegen.
Dur bunt genog alternatieven, moar wal oppassen dat neet alle schoäpe onder zunnepanelen komp te lopen.

Ten Negende
Bi-j de brandweer bunt ze an’t bezunigen, doarumme mot ze een van de wagens wegdoon.
Noa moar oppassen, dat ze neet, ’t “Jöddenspuitje”, weer in mot zetten.

Ten Tienden
De rente om ons pensioen te berekkenen is belabberd.
As dat neet verandert, dan kriege wi-j steeds minder in onze knippe.
Ze hopt in Den Haag zeker, dat dee oale leu meer last kriegt van;
“Alles wordt minder, moar ’t vergetten wod meer.”

Ten Elfden
Een aantal items oet deze proclamatie kunne wie neet veranderen,

En doarumme zegge wi-j;

“No is ‘t tied veur een pilsje”

Grolle Alaaf!

Aldus op’emaakt in de mooie veste Grol anno 2020,
Achtste Tweede Jeugd-Prins Cor & Achtste Tweede Jeugd-Adjudant Harrie